Priye Pran Nath Sadar Pranam Lyrics
पिरिये पिराननाथ सादर प्रणाम
किरपा महादेव कुशले कुशल अछ
अहाँ लए सबहक अतमा वेकल अछ
मोनो नै हैत पिया मुंहों हमर मुदा
बिसरल नै हेबय सासुर के नाम
पिरिये पिराननाथ सादर प्रणाम
भोरे उठे छी भानस करै छी
अपनहि हाथे पानियो भरै छी
एसगर मे आँगन दाँते कटैए
माय चलि गेलऐछ नानी के गाम
पिरिये पिराननाथ सादर प्रणाम
बहिना सिखेलखिन ताशक खेल
कोट-पीस हमरा खेलैले आबि गेल
रंगक बीबी इक्का जे बढ़ता
अहाँ छी साहेब अहाँ छी गुलाम
पिरिये पिराननाथ सादर प्रणाम
परसुखिन एलखिन बुच्ची केर ओझा
कहलनि कत्ते तँ गेलियनि सोझाँ
लाजे परेलियै बैसबो नै केलियै
जखने ओ पुछला साढू केर नाम
पिरिये पिराननाथ सादर प्रणाम
खोपा बन्होने रही केश फलकौआ
कोंचा बला नुआ छलै आँचर घुमौआ
अझक्के मे देखलक उहो मुँहझौंसा
अहीँ के गामक बुढ़बा हजाम
पिरिये पिराननाथ सादर प्रणाम
बाबू बिगड़ला माँओ बिगड़ली
नाको कटौलें जो गे अभगली
गलती जे भेल पिया माफी से करबै
रखबै दया कने रखबै धियान
पिरिये पिराननाथ सादर प्रणाम
कोई टिप्पणी नहीं:
एक टिप्पणी भेजें
अपन रचनात्मक सुझाव निक या बेजाय जरुर लिखू !