मिथिला धरोहर, दिल्ली : क्षेत्रीय भाखा मे एहन फ़िल्म निर्माण कुनो जुनूनी निर्देशक टा कऽ सकैत अछि। निर्देशक नितिन नीरा चन्द्र किछु एहने जुनून लऽ के चलल छैथ। एक बेरा फेर सँ ओ मिथिलांचलक गाम मे छथि। एही बेरा हिनक भाखा मैथिलि अछि। फ़िल्मक नाम अछि 'मिथिला मखान प्राइवेट लिमिटेड" और खास बात इ अछि जे ओ वास्तविक लोकेशन पर फ़िल्म शूट कऽ रहल छैथ। मैथिली सिनेमा के ५० बरख पूर्ण भऽ चुकल अछि, अपन प्रोडक्शन कंपनी चंपारन टॉकीज के दिस सँ ओ मैथिली सिनेमा के आदरांजलि दऽ रहल छथि, फ़िल्म “मिथिला मखान प्राइवेट लिमिटेड" के रूप मे। बरख १९६५ मे पहिल मैथिली फ़िल्म कन्यादान प्रदर्शित भेल छल।
आबै वला एही फ़िल्म के फिल्मांकन न्युयोर्क आ टोरंटो के उपरान्त आब मिथिलांचल (दरभंगा) मे चलि रहल अछि। दरभंगा केर उपरान्त एहि फिल्मक शूटिंग सुपौल आ नेपाल मे होयत। निर्देशक नितिन नीरा चन्द्र के पूर्ण कोशिश अछि जे फ़िल्म के तकनीकी रूप सँ सर्वश्रेष्ठ तरीका सँ प्रस्तुत कैल जाय। ताहि लेल एही फ़िल्म मे सिनेमेटोग्राफर के रूप मे जस्टिन जे चैंबर्स जेहन दक्ष तकनिशियन के शामिल कैल गेल अछि। कलाकार रूप अधिसंख्य नाम एहेन अछि जे हिन्दी फिल्म उद्योग मे अपन प्रतिभा प्रदर्शित कऽ चुकल छथि। मुख्य भूमिका मे क्रान्ति प्रकाश, अनुरिता झा आ पंकज झा एहने नाम अछि। तहिना मैथिली रंगमंच केर माँ प्रेमलता मिश्र प्रेम संग अनेको परिपक्व अभिनेता-अभिनेत्रीक उपस्थिति अछि एहि फिल्म मे। प्रवेश मल्लिक केर संगीत मे सुरेश वाडकर आ श्रेया घोसाल केर मधुर गायन सेहो सुनवा के लेल भेटत। आय जे पहचान मराठी सिनेमा बनेलक अछि, वैह पहचान अगर मैथिलि फ़िल्म के भेटत तऽ नव सभ्यता विकसित होयत। मैथिली फिल्म लेल कैल गेल इ प्रयास निश्चित रूप सँ मैथिलि सिनेमा के वैश्विकता प्रदान करबाक मे सफल रहत, से शुभकामना अछि।
कोई टिप्पणी नहीं:
एक टिप्पणी भेजें
अपन रचनात्मक सुझाव निक या बेजाय जरुर लिखू !