Bishara Geet Lyrics Maithili
● कोन मास नागपञ्चमी भेल Lyrics
कोन मास नागपञ्चमी भेल
राम घरे-घरे बिसहरि पूजा लेल
काहुक घर बिसहरि दूध लाबा लेल
राम कहुक घर बिसहरि खीर भोजन लेल
भगता घर बिसहरि दूध लाबा लेल
राम सेबक घर बिसहरि खीर भोजन लेल
सावन मास नागपञ्चमी भेल
राम घर-घर बिसहरि पूजा लेल
जोरा छागर देब दन्त पान
राम बनहि देब घरबा करु विश्राम
बेलपत्र हरियर अरहुल लाल
राम चम्पा फूल फूलय माँ के
गला ग्रिमहार
पहीर ओढि मईया फड गेली ठाढि
राम सूर्यक ज्योति मलीन इड जाय
भनहि विद्यापति बिसहरि माय
राम सब दिन सब ठाय रहब सहाय
● पीयर अंचला बिसहरि के Lyrics
पीयर अंचला बिसहरि के लाम्बी-लाम्बी केस
राम अही बाहे जेती बिसहरि तरहुत देस
आंहु के सिंगार बिसहरि लाबा-दूध
राम हमर सिंगार अछि गोदी भरि पूत
तेल दे तेलिया भाई
दीप दे कुम्हार
राम बाती दे रे पटबा भैय
लेसब प्रहलाद
लागल दिया दयकि गेल बाती
राम खेलड लगली बिसहरि माय चारु पहर राति
भनहिं विद्यापति सुनु हे महेश
राम गौरी दाय के पांचो बेटी
हरथि कलेश
● विषहरि सेबि मोरा किछु नहि भेल Lyrics
विषहरि सेबि मोरा किछु नहि भेल
बाँझिन पद मोरा रहिये गेल
केयो नीपय अगुआर, केयो पछुआर
हमहुँ अभागलि द्वार घेने ठाढ़ि
केओ लोढ़य बेली फूल, केओ अढूल
हमहुँ अभागल तिरिया खोदू नामी दूभि
केओ मांगय अन-धन, केओ पूत
हमहुँ अभागलि कर जोड़ि ठाढ़ि
भनहि विद्यापति विषहरि माय
सभ दिन सभ ठाम रहब सहाय
● ऊँची रे अटरिया पर विषहरि माय Lyrics
ऊँची रे अटरिया पर विषहरि माय
राम, नीची रे अटरिया पर सोनरा के भाय
देबौ रे सोनरा भाइ डाला भरि सोन
राम, गढ़ि दिअनु विषहरिके कलस पचास
बाट रे बटोहिया कि तोहें मोर भाइ
राम, कहबनि विषहरिके कलसा लय जाइ
तोहरो विषहरि के चिन्हियो के जानि
राम, कहबनि कोनाकऽ कलस लए जाय
हमरो विषहरि के नामी-नामी केश
राम, मुठी एक डाँर छनि अल्प बएस
सरोवर-दह विषहरि लेल प्रवेश
राम, दह पइसि पाँचो बहिनि खेलू झिलहेरि
पुरइनि पात विषहरि करू डगमग पानि
राम, ताहि चढ़ि पाँचो बहीनि देखू संसार
नाह दए नवेरिया भइया दए करूआरि
राम, विषहरि जेती मृत्युभुवन सेवक ओहि ठाम
ककर घर विषहरि दूध-लाबा लेल
राम, ककर घर विषहरि खीर-मखान
सबहक घर विषहरि दूध-लाबा लेल
राम, सेवक घर विषहरि खीर-मखान
● विषहरि विषहरि, करे छी पुकार Lyrics
विषहरि विषहरि, करे छी पुकार
कतहुँ ने देखै छी, जननी हमार
तेल दे रे तेलिया भइया, दीप दे कुम्हार
बाती दे रे पटबा भइया, लेसू प्रहलाद
नाव दे रे मलहवा भइया, घरू करूआर
जायब सरोवर-पार होइए अबेर
● पियरी अँचरी विषहरि नामी-नामी Lyrics
पियरी अँचरी विषहरि नामी-नामी केश
घुमइत आबय विषहरि तिरहुत देश
तोहरो सिंगार विषहरि लाबा आर दूध
हमरो सिंगार विषहरि गोदी भरि पूत
तोहरो सिंगार विषहरि अड़हुल फूल
हमरो सिंगार विषहरि सिर के सिनूर
फल मध्य गुअबा, नबेद मध्य पान
देवी मध्य विषहरि, दोख नहि जान
● कागा लऽ गेल मुद्रिका Lyrics
कागा लऽ गेल मुद्रिका, चिल्होरि ग्रीमहार
राम, ताहि लेल विषहरि रोदना पसार
सोन ले रे सोनरा, रूपा ले पटबा
राम, गढ़ि दए सोनरा मैया सोने ग्रीमहार
पहिरि लीअ विषहरि भैया, गले ग्रीमहार
राम, कर लागू आहे विषहरि सेवक गोहार
नाव ला रे मलहा भइया आरो करुआरि
राम, विषहरि औती मृतभुवन, हरती कलेश
● नीची रे पोखरिआ के ऊँची रे Lyrics
नीची रे पोखरिआ के ऊँची रे मोहार
राम, ताही पइसि विषहरि करू स्नान
नहाय सोनाय विषहरि थकरथि केश
राम, सोना के ककहिया काग लए गेल
कनैते-खीजैते विषहरि आमा आगू ठाढ़ि
राम, सोना के ककहिया आजु काग लए गेल
जुनि कानू, जुनि खीजू, विषहरि माय
राम, सोना के ककहिया हम देब बनबाय
फल मध्य गुअबा, नैवेद्य मध्य पान
राम, देवी मध्य विषहरि जगत लोक जान
● छोटी-मोटी नीमक गछिया Lyrics
छोटी-मोटी नीमक गछिया, चतरल-चतरल डारि
ताही ठाम पाँचो बहिनी, खेलय जुआ सारि
जुअबा खेलइते माइ हे, टुटल गृमलहार
कनइते खिजइते विषहरि, गहबर लोठाइ
जुनि कानू, जुनि खीजू विषहरि माइ
आबऽ दिअ पटबा, गथायब गृमलहार
पहिरि-ओढ़िय विषहरि, आंगन भेली ठाढ़ि
चान-सुरूजक जोति, गेल मुरझाइ
● कओने फूल उज्जर, कओने फूल लाल Lyrics
कओने फूल उज्जर, कओने फूल लाल
कओने फूल विषहरि के सोभय ग्रीवाहार
बेली फूल उज्जर, गेन्दा फूल लाल
अढ़ूल फूल विषहरि के शोभय ग्रीवाहार
पहीरि ओढ़िय विषहरि आंगन भेली ठाढ़
सुरूजक जोति विषहरि कयल मलीन
● साओन विषहरि लेल प्रवेश Lyrics
साओन विषहरि लेल प्रवेश
भादव विषहरि खेलल झिलहेरि
आसिन विषहरि भगता लेल पान
कार्तिक विषहरि नयना झरू नोर
अगहन विषहरि होयतीह अनमोल
सभ दिन सभठाम रहथि सहाय
● छोटी-मोटी अंगनामे बहुत पसार Lyrics
छोटी-मोटी अंगनामे बहुत पसार
राम, मिलैत-जुलैत विषहरि के भए गेल साँझ
आमा गर मिलय गेली पउती-पेटार
राम, बाबा घर मिलय गेली देल धेनु गाय
भउजो गर मिलय गेली, मुखहु ने बोल
राम, भइया गर मिलय गेली लहंगा-पटोर
● पांच बहिनियाँ हे मइया Lyrics
पांच बहिनियाँ हे मइया पांचो उतफाल
छोटी रानी विषहरि कनूनियां आंगन ठाढ़ि
लाबा दे रे कनूनियां भैया, पूजब ब्रजनाग
पांच बहिनियां हे मइया, पांचो उतफाल
छोटी रानी विषहरि गोअरबा आंगन ठाढ़ि
दूध दे रे गोअरबा भैया, पूजब ब्रजनाग
पांच बहिनियाँ हे मइया पांचो उतफाल
(एहिना तेलिया सँ तेल, कुम्हरासँ दीप आ पटबासँ पाट-सूत डोरी माँगब)
● कोने बहिनी पातरि-छीतरि Lyrics
कोने बहिनी पातरि-छीतरि, कोने बहिनी मोट
कोने बहिनी लोढ़य कमलक फूल
फुलबा लोढ़इते विषहरि गेली मउलाइ
माझे रे कदम तर विषहरि गेली मउलाइ
जएह किछु मंगबें अभगली झटपट मांग
जायब मृतभुवन होइ छै सांझ
पुत्र जे देब विषहरि, छीनि जुनि लेब
बांझी पद छोड़ायब विषहरि, पति राखि लेब
● छोटी-मोटी जमुना-दहमे Lyrics
छोटी-मोटी जमुना-दहमे, छोटी नील गाछ
राम, ताहि तर विषहरि खेलू जुआसारि
जुअबा खेलइते विषहरि भेली बेसूधि
राम, ताहि खन काग उड़ि हार लय गेल
कनइते-खीजइते विषहरि धयल पछोर
राम, जहाँ धय बैसबह, दागब तोर ठोर
बाटहि भेटि गेला महादेव बाप
राम, कहाँ तोर आसन-वासन, कहाँ स्थान
किनकर बेटी तोहेँ, किये थिक नाम
जमुना-दह आसन-वासन, नीमतर चउपाड़ि
राम, गौरी दाइ के बेटी हम, विषहरि नाम
● पीअर आँचर विषहरि, थकरल केश Lyrics
पीअर आँचर विषहरि, थकरल केश
राम, सेवक दुख सुनय विषहरि लेल परवेश
किये लय पूजू मइया, किये चढ़ाएब
राम, किये लए करब मइया तोहरो शृंगार
दूध लऽ पूजब मइया, लाबा चढ़ाएब
राम, अड़हुल फूल लय करब शृंगार
फल मध्य गुअबा, नैवेद्य मध्य पान
राम, देवी मध्य विषहरि, दोसर ने आन
● छोटी-मोटी दहक तट पर Lyrics
छोटी-मोटी दहक तट पर निमुआ के गाछ
राम, ताहि तर पाँचो बहिनि झिहरी खेलाय
झिहरी खेलाइते विषहरिके टूटल ग्रीमहार
राम, कनैत खीजै विषहरि आमा आंगा ठाढ़ि
जुनि कानू जुनि खीजू विषहरि दाइ
राम, अहू सऽ उत्तम गंथबा देब ग्रीमहार
पहिरि ओढ़िये विषहरि गहबर भेली ठाढ़ि
राम, सूर्यक ज्योति मलिन केने जाय
भनहि विद्यापति सुनू विषहरि माय
राम, सभ दिन सभ ठाम रहब सहाय
कोई टिप्पणी नहीं:
एक टिप्पणी भेजें
अपन रचनात्मक सुझाव निक या बेजाय जरुर लिखू !